Moskva “Spartak” jamoasi yangi bosh murabbiy borasida bir qarorga keldi. OAV xabariga ko'ra, bu asli italiyalik germaniyalik mutaxassis Domeniko Tedesko bo'ladi.
Uning nomzodini “qizil-oqlar” bosh direktori Tomas Zorn taklif qilgan. Klub bu variantni ma'qulladi va terma jamoa o'yinlari uchun tanaffus so'ngida 34 yoshli murabbiyni tayinlashni rejalashtirmoqda.
FAN xabariga ko'ra, yangi jamoadagi murabbiyning maoshi yiliga 3 million yevroni tashkil qiladi. Kelishuvning boshqa tafsilotlari haqida xabar berilmagan.
Mutaxassisning so'nggi klubi "Shalke-04" bo'lgan. E'tiborlisi, u 2017/18 yilgi mavsumda ushbu jamoa bilan Germaniya chempionatida kumush medalni qo'lga kiritgan, keyingi yili esa ishdan bo'shatilgan. Uning shogirdlari ketma-ket beshta mag'lubiyat alamini totib ko'rishdi va turnir jadvalida 14-o'rinni egallab turishdi. 34 yoshli Tedesko «Shalke»ga o'tgunga qadar «Shtutgart» va «Xoffenxaym» jamoalari boshqaruvida ishlagan.
Shu dam olish kunlari “Spartak” rossiyalik mutaxassis Oleg Kononovni iste’foga chiqardi, uning qo‘l ostida jamoa Yevropa ligasi saralashidan o‘ta olmadi, shuningdek, RPLda qatorasiga beshinchi mag‘lubiyatga uchradi.
Comments 0